Daniel 4
Ahi Rie Lat Keihoen onen min Asuv Houlu Nebukanesa
Daniel 4:1-8,19-37
1Asuv houlu Nebukanesa san tisien koanek va min meatin savsav keil onen koa aselus en selusien savsav keil koa amul en kantri vasi keil koa kei losil kati. Tisien enek vit:- Amas ka tomat hel en kami.
- Mihetaengon asa koa ekvati mahiteni usil merikel keil ka tounah sav keil koa amariso koa Ahi ten Keihoen rie lati minau.
Kei rie lat keihoen onen kistal en mari sakien keil koa mul mumoni.
Losilkatien onen sakras vavus,
ka keihoen hel en hen lisenges.
4
- Mulamu, inau, Nebukanesa, naro en mari teim sak. Nalonge tahos vis tahos imok, ka nales tahosien lises en moulien onak.
- Sakini, navise ruain hetetamen keil vasi onak ten out Babilon avamai avahit kilea aneite ten matilvovoien onak minau.
- Ka navong Daniel Beltesasar long usili ka rendem kilea aneite teni, en von ka sakras vaselus veni rendemien onen muasi. Sakini naviteni mini navit, “Beltesasar, konamaentei matilvovoien onak ka aneite teni noumonuk konametau.”
- Sakini Beltesasar viteni minau vit, “O asuv houlu, isom va nesa vis va nesa mok. Ekvati mok keke matilvovoien koanek ka aneite teni hemai hehi anatin en vativieh keil onom, ka hervitei keik.
- “Avong komul semau koles matilvovoien koanek, angelo tai ka en out nesa mita en out netan ka viteni vit, 'Ta lat vatiai koanek vaha netan ka kita vuol eni. Ka kiling vatte ka lite keil teni heles en atan. Hevus, kitoh kati hekeih en stirap keil koa avi aean ka brons. Evus, kilingi heles en mesaiuai, out koa oumunai mul moul ien. Vatiai enek vi tatavolien tai usil meatin tai. Kei heha heto hetal min tirendan keil ka tilep hekasi sua hehi oulu (7).'
- “O asuv houlu koa isom vina nesa vis vina nesa mok, aneite ten matilvovoien koa Ahi ten Keihoen meng kati minuk hekistal hemukok:
- “Navong angelo meng kati keke aling vatte ka lite keil amules en atan, koakeilu enek, aneite teni mul. Losilkatien ten kantri onom, hemai ris venuk en avong koa kindem kilea suk keke losilkatien ten kantri vasi keil ten out netan mul enges en hen Ahi ten out nesa.
- Ka tounah vasi keil enek kistal mai vi anatin enau, koa navi asuv houlu Nebukanesa.
- Navong namules veah naselus, rea tai ka en out nesa ka selus minau vit, “!Asuv houlu Nebukanesa, kitaengon nau! Koanek vi asa koa Ahi meng kati keke vakistal en moulien onom. Losilkatien koa mul en hem, Ahi kulati tuai ranuk.
- Hatte tas, selusien keil enek mae kistal vi anatin enau, koa navi asuv houlu Nebukanesa. Meatin keil alikat nau nalokovein keil ka nuva naro sasok enges. Nakan oumunae suval buluk ka tilep kas avek. Hiluk moul tetaveah suval avuken tomeahos, ka uti hek moul tetaveah suval uti alen veivakum enges.
- Navong sua oulu (7) mai muli, inau, asuv houlu Nebukanesa, nasei pat vina en teilang ka rendemien onak mai ris tahos. Evus, navati lat isen Ahi ten Keihoen ka navouhou mini veni kei vi hetetamen imok ka mul lisenges, ka navit,
Keihoen mules en hen lisenges.
35En lesien onen, meatin keil ten out netan avi heisav enges,
ka kei mum musil rendemien onen ral min angelo keil ten out nesa ka meatin keil ten out netan.
Meatin tovuol vating koe asa koa kei envati voumoni,
vuo vahisi vahit, '?Vensa komumoni mukonek?'”
36
- Navong naviteni mukonek, rendemien onak maluv mai ris tahos. Evus, hetetamen keil onak alei katnau ka akur revi nau. Keil avouhou minau mulin koa amumoni mulamu, ka asan ris losilkatien ten kantri onak mai ris en hek.
- Sakini, kosa, inau, asuv houlu Nebukanesa, namul nasan masmasien ka houhouen min Ahi koa vi Asuv Houlu ten out nesa ka navati lat Isen. Tounah vasi koa kei mumoni mal revi, ka kei kilea voumon rendemien onen koakeil avut keil vaha netan.
Copyright information for
PMA